မကွေး၊ ဇန်နဝါရီ ၅

           လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ပြည်ထောင်စု ဝန်ကြီးဒေါက်တာဝင်းမြတ်အေးသည် ယနေ့မွန်းလွဲပိုင်းက မကွေးတိုင်းဒေသကြီး မင်းဘူးမြို့နယ် တွင် ဧရာဝတီမြစ်ရေတိုက်စားမှုကြောင့် ကမ်းပါးပြိုကျမှုဒဏ် ခံစားရသော နိဗ္ဗာန်ကျွန်းကျေးရွာနှင့် မုန်းကျိုးကျေးရွာများသို့ ရောက်ရှိပြီး ကမ်းပါးပြိုကျမှုကြောင့် ကျေးရွာများပြောင်းရွှေ့နေရမှု အခြေအနေ၊ ကြိုတင်ကာကွယ်ရေးအတွက်  မြစ်ကမ်းပါးထိန်းသိမ်းခြင်း လုပ်ငန်းများ ဆောင်ရွက် နိုင်မည့်အခြေအနေများကို ကြည့်ရှုပြီး မင်းဘူးမြို့နယ်ရှိ လွှတ်တော်ကိုယ်စားလှယ်များ၊ ရပ်မိရပ်ဖ များ၊ ကျေးရွာသူကျေးရွာသားများ၊ တာဝန်ရှိသူများနှင့် ညှိနှိုင်းဆွေးနွေးခဲ့ပါသည်။

          အဆိုပါ ဧရာဝတီမြစ်ရေတိုက်စားမှုကြောင့် ၂၀၁၃ခုနှစ်တွင် အိမ်ခြေ (၂၀၀)၊ အိမ်ထောင်စု (၂၁၁)စု၊ လူဦးရေ (၉၁၂)ဦး ပြောင်းရွှေ့ခဲ့ရပြီး ယခုအခါ ဧရာဝတီမြစ်နှင့် နိဗ္ဗာန်ကျွန်းကျေးရွာ ရွာသစ်မှာ ပေ(၃၀၀)ခန့်သာ ကွာဝေးတော့သဖြင့် ကြိုတင်ကာကွယ်ရေးလုပ်ငန်းများ ဆောင်ရွက် ရန် လိုအပ်လျက်ရှိကြောင်း သိရှိရပါသည်။

မြန်မာနိုင်ငံတွင် မြစ်ကမ်းပါးပြိုမှုများသည် ၂၀၁၆ ခုနှစ်ခန့်မှစ၍ နောက်ပိုင်းတွင် ပိုမို အဖြစ်များလာသည်ကိုတွေ့ရှိရပြီး ကမ်းပြိုမှုကြောင့် လူ့အသက်သေဆုံးမှု၊ အိုးအိမ်အဆောက်အဦ များထိခိုက်ပျက်စီးမှုနည်းပါးသော်လည်း စိုက်ပျိုးမြေများ၊ ရွာမြေများ တိုက်စားပါရှိသွားခြင်း ကြောင့် အသက်မွေးဝမ်းကျောင်းလုပ်ငန်းများ  ပျက်စီးဆုံးရှုံးခြင်း၊  ပြည်သူလူထု၏ မြေယာအိုးအိမ် ပိုင်ဆိုင် မှုများ ဆုံးရှုံးခြင်းတို့ ဖြစ်ပေါ်လျက်ရှိပါသည်။

          ၂၀၁၆-၂၀၁၇ ဘဏ္ဍာရေးနှစ်၊ ၂၀၁၇-၂၀၁၈ ဘဏ္ဍာရေးနှစ်နှင့် ၂၀၁၈ခုနှစ်၊ ဧပြီလမှ စက်တင်ဘာလအထိ ကမ်းပြိုမှုဖြစ်စဉ်များအရ တိုင်းဒေသကြီး/  ပြည်နယ်(၁၂)ခုတို့တွင် ဖြစ်ပွား ခဲ့ပြီးအိမ်ခြေပေါင်း(၁၃၀၀၀)ခန့်ကို ရွှေ့ပြောင်းခံရကာ ဧရာဝတီတိုင်းဒေသကြီး၊ ပဲခူးတိုင်းဒေသကြီး နှင့် မကွေးတိုင်းဒေသကြီးတို့တွင် အများဆုံးဖြစ်ပွားခဲ့သည်ကိုတွေ့ရှိရပါသည်။

          မြစ်ကြောင်းအနေဖြင့်ကြည့်ပါက ဧရာဝတီမြစ်ကြောင်းတလျောက် အများဆုံးဖြစ်ခဲ့သည်ကို တွေ့ရှိရပြီး ကမ်းပြိုမှုကာကွယ်ထိန်းသိမ်းခြင်းလုပ်ငန်းများတွင် ပိုမိုအလေးပေးဆောင်ရွက်ရန် လိုအပ်လာသည်ကို တွေ့ရှိရပါသည်။ ကမ်းပြိုဘေးကာကွယ်ရေးဆောင်ရွက်ရာတွင် မြစ်ကမ်းပါး များ၌ သစ်ပင်များစိုက်ပျိုးခြင်း၊ ကျောက်စီမြေထိန်းနံရံများပြုလုပ်ခြင်း၊ မြစ်ကြောင်းအတွင်း သဲနုန်းများ တူးဖော်ခြင်းစသည်ဖြင့် နည်းပညာပိုင်းဆိုင်ရာနှင့် ငွေကြေးကုန်ကျမှုများပြားသော လုပ်ငန်းများ ဖြစ်သော်လည်း သဘာဝဘေးကြောင့်ထိခိုက်ဆုံးရှုံးနိုင်ခြေလျော့ပါးရေးလုပ်ငန်းများ တွင် ရင်းနှီးမြှုပ်နှံဆောင်ရွက်ပါမှ ထိခိုက်ဆုံးရှုံးမှုနည်းပါးပြီး ဘေးဒဏ်ကို ကြံကြံခံနိုင်ရင်ဆိုင် တုံ့ပြန်နိုင်သော ရပ်ရွာဖြစ်ပေါ်လာမည်ဖြစ်ပါသည်။

          လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနသည် အမျိုးသား သဘာဝဘေးအန္တရာယ်ဆိုင်ရာစီမံခန့်ခွဲမှုကော်မတီ၏ ဦးဆောင်လမ်းညွှန်မှုဖြင့် သဘာဝဘေး စီမံခန့်ခွဲမှုလုပ်ငန်းများကို  ဆောင်ရွက်လျက်ရှိရာ ကမ်းပြိုဘေးကြောင့် ရွှေ့ပြောင်းနေထိုင်ရသော မိသားစုများကို ထောက်ပံ့ကူညီမှုများ ဆောင်ရွက်နေသကဲ့သို့ ကမ်းပြိုဘေးကြိုတင်ကာကွယ်ရေး လုပ်ငန်း များကိုလည်း သက်ဆိုင်ရာဝန်ကြီးဌာနများ၊ တိုင်းဒေသကြီး/ ပြည်နယ်အစိုးရအဖွဲ့များနှင့် ပူးပေါင်း ညှိနှိုင်းဆောင်ရွက်လျက်ရှိကြောင်း သိရှိရပါသည်။

          ယနေ့နံနက်ပိုင်းကလည်းဒုတိယဝန်ကြီးဦးစိုးအောင်နှင့်တာဝန်ရှိသူများသည်မကွေးမြို့နယ်၊ မယ်လှတောင်ကျေးရွာအုပ်စု၊ မြင်းကင်းကျေးရွာတွင် လူမှုကာကွယ်စောင့်ရှောက်ရေး အထောက် အပံ့များဖြစ်သော မသန်စွမ်းသူများအား ထောက်ပံ့ခြင်း၊ သက်ကြီးရွယ်အိုများအား လစဉ် လူမှုရေးပင်စင်ထောက်ပံ့ခြင်း၊ ကိုယ်ဝန်ဆောင်မိခင်များအား ထောက်ပံ့ခြင်း၊ (၆)လအောက် ကလေးငယ်နှင့် မိခင်များအားထောက်ပံ့ခြင်း၊ အမျိုးသမီးဦးဆောင်မိသားစုများအား ထောက်ပံ့ခြင်း၊ မကွေးမြို့နယ်အတွင်းရှိ  အရပ်ဘက်လူမှုရေးအဖွဲ့အစည်းများအား ထောက်ပံ့ခြင်းများကို ဆောင်ရွက်ခဲ့ကြောင်းနှင့် မိမိဝန်ကြီးဌာနအောက်ရှိ ဝန်ထမ်းများအားတွေ့ဆုံပြီး လုပ်ငန်းများ ပိုမို အောင်မြင်စေရန်ကြိုးစားကြရန်နှင့် ဝန်ထမ်းများ၏ တင်ပြချက်နှင့် လိုအပ်ချက်များကို ညှိနှိုင်း ဖြည့်ဆည်းဆောင်ရွက် ပေးခဲ့ကြောင်း သတင်းရရှိပါသည်။