လူမှုရေးရာဖြစ်ရပ်စီမံခန့်ခွဲမှုစနစ်တည်ဆောက် အကောင်အထည်ဖော်ဆောင်ရွက်ခြင်း

လူမှုရေးရာဖြစ်ရပ်စီမံခန့်ခွဲမှုစနစ်တည်ဆောက် အကောင်အထည်ဖော်ဆောင်ရွက်ခြင်း

    လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၏ ဦးဆောင်မှုဖြင့် ကုလသမဂ္ဂလက်အောက်ခံအဖွဲ့အစည်းများ၊ နိုင်ငံတကာနှင့် ပြည်တွင်းအစိုးရ မဟုတ်သော အဖွဲအစည်းများနှင့်ပူးပေါင်း၍ လူမှုရေးရာဖြစ်ရပ် စီမံခန့်ခွဲမှုလုပ်ငန်းစဉ်ကို ၂၀၁၅ ခုနှစ်တွင်မြို့နယ်(၂၇)မြို့နယ်တွင် စတင်အကောင်အထည်ဖော် ဆောင်ရွက်ခဲ့ပါသည်။ ၂၀၁၆ ခုနှစ်တွင် မြို့နယ်(၁၀)မြို့နယ် တိုးချဲ့ခဲ့ပါသည်။ လူမှုရေးရာဖြစ်ရပ်စီမံခန့်ခွဲမှု လုပ်ငန်းလမ်းညွှန် ကို ၂၀၁၅ခုနှစ်၊ နိုဝင်ဘာလတွင် ထုတ်ပြန်နိုင်ခဲ့ပါသည်။
လူမှုရေးရာ ဖြစ်ရပ်စီမံခန့်ခွဲမှုစနစ်ဆိုသည်မှာ ရပ်ရွာအတွင်းလူမှုရေးဆိုင်ရာ ပြဿနာ များဖြေရှင်းရာတွင် စနစ်တကျလေ့ကျင့်ပေးထားသော လူမှုဝန်ထမ်းသမားများ၏ အကူအညီဖြင့် ရပ်ရွာအတွင်းရှိ အရင်းအမြစ်များနှင့် ဝန်ဆောင်မှုများကိုအသုံးပြု၍ စီမံခန့်ခွဲသော ဖြစ်စဉ် ဖြစ်ပါသည်။ လူမှုရေးရာဖြစ်ရပ်စီမံခန့်ခွဲမှုစနစ်အား ကလေးသူငယ်ကာကွယ် စောင့်ရှောက်ရေး လုပ်ငန်းများဖြင့် စတင်ဆောင်ရွက်မည်ဖြစ်ပြီး နောက်ပိုင်းတွင် အခြားသောလူမှုရေး ဦးတည် အုပ်စုများအတွက် တိုးချဲ့ဆောင်ရွက်သွားမည်ဖြစ်ပါသည်။ လူမှုရေးရာ ဖြစ်ရပ် စီမံခန့်ခွဲမှုစနစ်အား လူမှုဝန်ထမ်းဦးစီးဌာနက လေ့ကျင့်ပေးထားသော  ဖြစ်ရပ်စီမံခန့်ခွဲသူများက ဦးဆောင်ပြီး မိတ်ဖက်အဖွဲ့အစည်းများမှ ဖြစ်ရပ်စီမံခန့်ခွဲသူများ နှင့်ပူးပေါင်း၍ ကလေးသူငယ်ကာကွယ် စောင့်ရှောက်ရေးလုပ်ငန်းများကို ရပ်ရွာအတွင်း ဆောင်ရွက်သွားမည် ဖြစ်ပါသည်။
    လက်ရှိတွင် လူမှုရေးရာဖြစ်ရပ်စီမံခန့်ခွဲသူ(၁၁၀)ဉီးရှိ၍ ၂၀၁၅ခုနှစ်မှ ၂၀၁၈ ခုနှစ် မတ်လ အထိကလေးသူငယ်ဖြစ်ရပ်ပေါင်း(၂၃၂၈)ကို ကိုင်တွယ်ဆောင်ရွက်ခဲ့ပါသည်။ ကလေး သူငယ်ဖြစ်ရပ်များသည် နေရာဒေသတိုင်းတွင် ဖြစ်ပေါ်နိုင်သဖြင့် လူမှုရေးရာဖြစ်ရပ်စီမံခန့်ခွဲ သူများကို ထပ်မံမွေးထုတ်ခြင်းနှင့် လူမှုဝန်ထမ်းအတတ်သိပ္ပံကျောင်းတွင် လူမှုရေးရာဖြစ်ရပ် စီမံခန့်ခွဲမှုလုပ်ငန်းစဉ် ရက်တိုသင်တန်းများကို ထည့်သွင်းပို့ချပေးလျက်ရှိပါသည်။
    လူမှုရေးရာဖြစ်ရပ်စီမံခန့်ခွဲမှုစနစ်အား အကောင်အထည်ဖော်ရန်အတွက် လူမှုဝန်ထမ်း ဦးစီးဌာန၊ UNIECF, Save the Children နှင့် မိတ်ဖက်အဖွဲ့အစည်းများဖြစ်သည့် ရတနာ့မေတ္တာ၊ KMSS, မြန်မာနိုင်ငံကြက်ခြေနီအသင်းတို့ ပူးပေါင်း၍ ဆောင်ရွက်လျက် ရှိပါသည်။
    လူမှုရေးရာ ဖြစ်ရပ်စီမံခန့်ခွဲမှုစနစ်အား အကောင်အထည်ဖော်ရာတွင် လူမှုဝန်ထမ်း ဦးစီးဌာနမှ ဖြစ်ရပ်စီမံခန့်ခွဲသူများ၊ တရားဥပဒေနှင့်ဆက်နွယ်သည့် ကလေးသူငယ်များ၊ ရုပ်ပိုင်းနှင့် လိင်ပိုင်းဆိုင်ရာ အလွဲသုံးမှုခံရသော ကလေးများ၊ ပျောက်ဆုံးကလေးများ၊ လူကုန်ကူးခံခဲ့ရသောကလေးများ၊  လက်နက်ကိုင်ပဋိပက္ခများနှင့် ပတ်သက်နေရသူကလေး များ၊ ဥပဒေနှင့်ရင်ဆိုင်နေရသော ကလေးများ၊ သင်တန်းကျောင်းများရှိ ကလေးများနှင့်  မိသားစုနှင့် ကွဲကွာနေသောအဖော်မပါသည့် ကလေးများအား မိသားစုပြန်လည် ဝင်ဆံ့ပေါင်း စည်းရေးအတွက် ဆောင်ရွက်သွားမည်ဖြစ်ပါသည်။
    ယခုအခါအဆိုပါ လူမှုရေးရာ ဖြစ်ရပ်စီမံခန့်ခွဲမှုဖြစ်စဉ်တွင် ကလေးသူငယ်ကိစ္စရပ်များ သာမက  ကျားမအခြေပြုအကြမ်းဖက်ခြင်းကို တိုးချဲ့ကိုင်တွယ် ဖြေရှင်းဆောင်ရွက်သွားမည် ဖြစ်သဖြင့် လုပ်ငန်းလမ်းညွှန်ကို ပြင်ဆင်ရေးဆွဲလျက်ရှိပါသည်။