နေပြည်တော်၊ သြဂုတ် ၁၇

မြန်မာနိုင်ငံရှိ အလုပ်ရှင်များအတွက် မသန်စွမ်းသူများအား အလုပ်ခန့်ထားခြင်းဆိုင်ရာ လက်စွဲစာအုပ် ရှင်းလင်းတင်ပြခြင်း အခမ်းအနားကို နေပြည်တော် ဇမ္ဗူသီရိဟိုတယ်၌ ယနေ့ နံနက်(၀၉:၀၀)နာရီတွင် ကျင်းပသည်။

ထိုအခမ်းအနားသို့ မသန်စွမ်းသူများ၏ အခွင့်အရေးများဆိုင်ရာ လုပ်ငန်းကော်မတီ ဥက္ကဋ္ဌ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာ ချထားရေး ဝန်ကြီးဌာန ပြည်ထောင်စု ဝန်ကြီးဒေါက်တာ ဝင်းမြတ်အေး၊ ကာကွယ်ရေးဝန်ကြီးဌာန ဒုတိယဝန်ကြီး ဗိုလ်ချုပ်မြင့်နွယ်၊ ပို့ဆောင်ရေးနှင့် ဆက်သွယ်ရေး ဝန်ကြီးဌာန ဒုတိယဝန်ကြီး ဦးကျော်မျိုး၊ ပညာရေး ဝန်ကြီးဌာန ဒုတိယဝန်ကြီး ဦးဝင်းမော်ထွန်း၊ မြန်မာနိုင်ငံ လူ့အခွင့်အရေး ကော်မရှင် ဒုတိယ ဥက္ကဋ္ဌ ဦးစစ်မြိုင်နှင့် လုပ်ငန်း ကော်မတီ အဖွဲ့ဝင်များ၊  မြန်မာနိုင်ငံလုံးဆိုင်ရာ အမျိုးသမီး ကော်မတီ အဖွဲ့ဝင်များ၊ မြန်မာနိုင်ငံရှိ အလုပ်ရှင်များအတွက် မသန်စွမ်းသူများအား အလုပ်ခန့်ထားခြင်းဆိုင်ရာ လက်စွဲစာအုပ် ပေါ်ထွက်လာရေး အတွက် ကူညီ ဆောင်ရွက် လျက်ရှိသော AAR (Japan) နှင့် Myanmar Centre for Responsible Business တို့မှ တာဝန်ရှိသူများ၊ မြန်မာနိုင်ငံ မသန်စွမ်းသူများ အသင်းချုပ်၊ INGO၊ NGO တို့မှ ဖိတ်ကြားထားသူများ တက်ရောက်ကြသည်။

ပြည်ထောင်စု ၀န်ကြီးက မသန်စွမ်း သူများအတွက် အလုပ်အကိုင် အခွင့်အလမ်းရရှိရေးသည် အလွန်အရေးကြီးသည့် ကိစ္စဖြစ်ပါကြောင်း၊ နိုင်ငံတော်အနေနှင့်လည်း မသန်စွမ်းသူများအတွက် အထူးအလေးပေး ဆောင်ရွက်နေပါကြောင်း၊ မသန်စွမ်းသူများနှင့် ပတ်သက်ပြီး ဆောင်ရွက်ခြင်းသည်  ပြန်လည် ထူထောင်ရေး လုပ်ငန်းစဉ်ထဲတွင် ပါဝင်နေပါကြောင်း၊ ထို့ကြောင့် ပြန်လည်ထူထောင်ရေးဦးစီးဌာနကို ဖွင့်လှစ်ပြီး စနစ်တကျ ကျယ်ကျယ်ပြန့်ပြန့် ထိထိရောက်ရောက် ဆောင်ရွက်နေပြီ ဖြစ်ပါကြောင်း၊ ပြည်သူများ၊ ဌာနဆိုင်ရာများ၊ လူမှုအဖွဲ့အစည်းများ ပူးပေါင်းပါဝင်ဖို့ လိုအပ်ပါကြောင်း၊

လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာနအနေဖြင့် ပြည်သူများ၏ လိုအပ်ချက်များကို မူတည်၍ တိုက်ရိုက် အကျိုးရှိစေသော လုပ်ငန်းများ ဆောင်ရွက်နေခြင်း ဖြစ်ပါကြောင်း၊ မသန်စွမ်းများအတွက် အလုပ်အကိုင် အခွင့်အလမ်း ရရှိရေးနှင့် ပတ်သက်၍ အစိုးရ၊ လုပ်ငန်းရှင်များနှင့် အလုပ်လုပ်ကိုင် လိုစိတ်ရှိသော မသန်စွမ်းများ ကိုယ်တိုင် ပူးပေါင်း ဆောင်ရွက်ကြရမည် ဖြစ်ကြောင်း၊ သုံးဦးသုံးဖလှယ် ဆောင်ရွက်နိုင်မှ မသန်စွမ်းသူများ၏ အလုပ်အကိုင် အခွင့်အလမ်းများ ထိရောက်စွာ ဖန်တီးဖော်ဆောင် နိုင်မည်ဖြစ်ပါကြောင်း၊ အစိုးရအနေဖြင့် မသန်စွမ်းသူများ၏ အခွင့်အရေးကို မြှင့်တင် ဆောင်ရွက်လျက်ရှိရာတွင် ဥပဒေ၊ နည်းဥပဒေများကို ပြဌာန်းပြီးနိုင်ငံတော် ဒုတိယသမ္မတ(၂) ဦးဆောင်သည့် အမျိုးသား ကော်မတီကို ဖွဲ့စည်းခြင်း၊ မဟာဗျူဟာ ရေးဆွဲချမှတ်ခြင်း၊ လုပ်ငန်းကော်မတီ၊ တိုင်းဒေသကြီး၊ ပြည်နယ် ကော်မတီများ အဆင့်ဆင့် ဖွဲ့စည်းခြင်းတို့ကို ဆောင်ရွက် လျက်ရှိပါကြောင်း၊ ၎င်းလုပ်ငန်းစဉ်တိုင်းတွင် အစိုးရဝန်ကြီးဌာန ပေါင်းစုံပါဝင် ဆောင်ရွက်လျက်ပါကြောင်း၊ မသန်စွမ်းသူများအတွက် စွမ်းဆောင်ရည်မြင့် တင်ပေးဖို့လိုပါကြောင်း၊  အားလုံး အကျုံးဝင် ပညာရေးစနစ်၊ မသန်စွမ်းများအတွက် ICT နည်းပညာအသုံးပြုသည့် အသက်မွေးဝမ်း ကျောင်းပညာရေး၊ မသန်စွမ်း အဆင့်သတ်မှတ်ပြီး ထိရောက်သော ပံ့ပိုးမှုပေးနိုင်ရေးတို့ဖြင့် မသန်စွမ်းသူများ မိမိကိုယ်တိုင် ဘဝရပ်တည်နိုင်ရန် ဆောင်ရွက်ပေးလျက်ရှိပါကြောင်း၊  အလုပ်ရှင်များ အနေဖြင့် အလုပ်သမားဥပဒေ၊ အလုပ်သမား အခွင့်အရေးတို့တွင် မသန်စွမ်း သူများအတွက် ထည့်သွင်း စဉ်စားဆောင်ရွက်ရေး၊ ကိုယ်ချင်းစာ စိတ်ထားရှိ ဆောင်ရွက်ရေး၊ မသန်စွမ်းသူများ အလုပ်ရရှိရေးအတွက် ဝေပုံကျနှုန်းထား ထားရှိဆောင်ရွက်ရန် ကြိုးပမ်းရေး၊ မသန်စွမ်းသူများကလည်း မိမိတို့ရရှိသည့်  အခွင့်အရေးများနှင့်အညီ တာဝန်ကျေပွန်စွာ ဆောင်ရွက်နိုင်ရေး ကြိုးပမ်းဆောင်ရွက်ကြရန် လိုအပ်ကြောင်း ပြောကြားခဲ့ပါသည်။

         ဆက်လက်၍ မြန်မာနိုင်ငံ မသန်စွမ်းသူများ အသင်းချုပ်မှ တာဝန်ရှိသူက သန်းခေါင်စာရင်းအရ မြန်မာနိုင်ငံတွင် မသန်စွမ်းသူဦးရေ (၄.၆) ရာခိုင်နှုန်းရှိပြီး၊ အစိုးရက ဥပဒေ၊ နည်းဥပဒေများဖြင့် မသန်စွမ်းသူများ၏ အခွင့်အရေးကို အကောင်အထည်ဖော် ဆောင်ရွက်လျက်ရှိရာ မသန်စွမ်းသူများအတွက် ပိုမိုကောင်းမွန်သော အကျိုးဖြစ်ထွန်းမှုများ ဖြစ်ထွန်း ပေါ်ပေါက်လာမည် ဖြစ်သည့်အတွက် ကျေးဇူးတင် ဝမ်းမြောက်ပါကြောင်း မုဒိတာ စကားပြောကြားပါသည်။

         Myanmar Centre for Responsible Business မှ Director ဖြစ်သူ Vicky Bowman ၊ AAR Japan မှ တာဝန်ရှိသူတို့က မသန်စွမ်းသူများအတွက် အလုပ်အကိုင် အခွင့်အလမ်းများ ရရှိရေး ဆောင်ရွက် ပေးနေမှုများကို ရှင်းလင်း ပြောကြားခဲ့ပါသည်။         ထို့နောက် Myanmar Centre for Responsible  Business နှင့် AAR (Japan) တို့မှ တာဝန်ရှိသူများက လက်စွဲစာအုပ်နှင့် ပတ်သက်၍ ရှင်းလင်း တင်ပြကြပြီး အစည်းအဝေး တက်ရောက် လာသူများက လက်စွဲစာအုပ်၊ မသန်စွမ်းသူများ၏ အလုပ်အကိုင် အခွင့်အလမ်း ဆိုင်ရာ တိုးတက်မှု အခြေအနေများ၊ လိုအပ်ချက်များ၊ သယ်ယူပို့ဆောင်ရေး၊ ပညာရေး၊ ကျန်းမာရေး၊ အလုပ်သမားရေးရာ ကဏ္ဍများ၊ ဆက်စပ်ဆောင်ရွက်ရန် အခြေအနေများ၊ ရှေ့ဆက် ဆောင်ရွက်မည့် အချက်တို့ကို ဆွေးနွေးခဲ့ကြကြောင်း သတင်းရရှိပါသည်။