နေပြည်တော်၊ ၁၇.၉.၂၀၁၈
    လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန အစည်းအဝေးခန်းမ၌ နေရပ်စွန့်ခွာသူများ ပြန်လည်လက်ခံရေးနှင့် ပြန်လည်နေရာချထားရေးကော်မတီ (၅)ကြိမ်မြောက် အစည်းအဝေးကို ယနေ့မွန်းလွဲပိုင်းတွင် ကျင်းပခဲ့ပါသည်။
    လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေးက အဖွင့်အမှာစကားပြောကြားရာတွင် ရခိုင်ပြည်နယ်အရေးနှင့်ပတ်သက်၍ ရခိုင်ပြည်သူပြည်သားများနှင့် ရခိုင်ပါတီဝင်များ ပူးပေါင်းပါဝင်ရမည်ဖြစ်ကြောင်း၊ ရခိုင်ပြည်နယ် အရေးသည် တစ်နိုင်ငံလုံးအရေးဟု ယူဆသည့်အတွက် ပြည်သူများအားလုံး ပူးပေါင်းပါဝင် ဆောင်ရွက်ပေးဖို့လိုအပ်ပါကြောင်း၊ အစိုးရအနေဖြင့် ရေတိုရေရှည်လုပ်ငန်းများ ဆောင်ရွက်ပေးဖို့ ရှိကြောင်း၊ အစိုးရအသစ်စတက်ကတည်းက တိုင်းရင်းသားအရေးနှင့် ပြည်တွင်းငြိမ်းချမ်းရေးကို ဦးစားပေးဆောင်ရွက်ခဲ့ပြီး ရခိုင်ပြည်နယ်အရေးကို အလေးထားဆောင်ရွက်လျက်ရှိကြောင်း၊ ရခိုင်ပြည်နယ်အရေးသည် ရေရှည်ဆောင်ရွက်ရမည့်ကိစ္စဖြစ်ကြောင်း၊ နေရပ်စွန့်ခွာသူများအနေဖြင့် ဘယ်လိုပင်စွန့်ခွါပါစေ အစိုးရအနေဖြင့် စိစစ်၍ ပြန်လည်လက်ခံရမည်ဖြစ်ကြောင်း၊ ကော်မတီတွင်တာဝန်ယူထားသူများအနေဖြင့် မိမိတို့၏တာဝန်ကို ကျေပွန်စွာ ထမ်းဆောင်ကြရန် လိုကြောင်း၊ ပြန်လည်လက်ခံရေးနှင့်ပြန်လည်နေရာချထားရေး လုပ်ငန်းစဉ်လိုအပ်ချက်များအတွက် သဘောတူညီချက်များနှင့်အညီ ကြိုတင်ဆောင်ရွက်ထားရန် လိုအပ်ကြောင်း၊
    ပြန်လည်လက်ခံရေးအတွက် မြန်မာ-ဘင်္ဂလားဒေ့ရှ် နှစ်နိုင်ငံ သဘောတူစာချုပ်များအရ ပြန်လည်လက်ခံရေးအစီအစဉ်များ ရေးဆွဲထားကြောင်း၊  ပုံမှန်နည်းလမ်းနှင့်ပြန်လက်ခံနိုင်ဖို့အတွက် အဟန့်အတား အနှောင့်ယှက်များကို  ဖော်ထုတ်ဆောင်ရွက်ရန်လိုအပ်ကြောင်း၊ လုပ်ထုံးလုပ်နည်းများ နှင့်အညီ အလေးထားဆောင်ရွက်သွားရန် လိုအပ်ကြောင်း၊ လုံခြုံရေးသည် အလွန် အရေးကြီးသော ကဏ္ဍဖြစ်ပါကြောင်း  ပြောကြားခဲ့ပါသည်။
     ဆက်လက်၍ နိုင်ငံတော်အတိုင်ပင်ခံရုံးဝန်ကြီးဌာန ဒုတိယဝန်ကြီးဦးခင်မောင်တင်၊ လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ဒုတိယဝန်ကြီး ဦးစိုးအောင်နှင့် တက်ရောက် လာသော ပြန်လည်နေရာချထားရေး လုပ်ငန်းကော်မတီ ပူးတွဲဥက္ကဌ၊ ရခိုင်ပြည်နယ်ဝန်ကြီး ဦးအောင်ကျော်ဇံနှင့် သက်ဆိုင်ရာ  ကော်မတီအဖွဲ့ဝင်များက အသီးသီး တင်ပြဆွေးနွေးခဲ့ကြပြီး ဆုံးဖြတ်ချက်များ ချမှတ်နိုင်ခဲ့ကြောင်း သတင်းရရှိပါသည်။