၁၅.၁.၂၀၂၁၊ နေပြည်တော်
လူမှုဝန်ထမ်းဦးစီးဌာနသည် လူမှုဖွံ့ဖြိုးတိုးတက်ရေးလုပ်ငန်းများအား အစိုးရမဟုတ်သော အဖွဲ့အစည်း(၃၆)ဖွဲ့ဖြင့် နားလည်မှုစာချွန်လွှာ၊ သဘောတူညီမှုစာလွှာ၊ နည်းပညာပူးပေါင်း ဆောင်ရွက်ရေး စာချွန်လွှာ၊ စီမံချက်သဘောတူညီချက်များအား လက်မှတ်ရေးထိုး၍ ဆောင်ရွက် လျက်ရှိပါသည်။
၂၀၂၁ခုနှစ်၊ ဇန်နဝါရီလ (၁၅)ရက်နေ့တွင် လူမှုဝန်ထမ်းဦးစီးဌာန၊ ညွှန်ကြားရေးမှူးချုပ် ဒေါက်တာစန်းစန်းအေးနှင့် Latter-Day Saint Charities (LDSC)အဖွဲ့မှ Asia Area Director ဖြစ်သူ Mr. Mickey Lui နှင့် Community Development Association (CDA)အဖွဲ့မှ ဥက္ကဌဖြစ်သူ ဒေါက်တာခင်မောင်ဝင်းတို့သည် သဘောတူညီမှုစာလွှာအား လက်မှတ်ရေးထိုးခဲ့ကြပါသည်။ အဆိုပါ သဘောတူညီမှုစာလွှာတွင်  လူမှုဝန်ထမ်းဦးစီးဌာန၏ လုပ်ငန်းရပ်ဖြစ်သော မသန်စွမ်းသူများ ပြုစုစောင့်ရှောက်ရေးလုပ်ငန်းတွင် အားဖြည့် ဆောင်ရွက်နိုင်မည့် မသန်စွမ်းသူများအတွက် သွားလာလှုပ်ရှား လွယ်ကူစေသည့် ကိရိယာများ ထောက်ပံ့ပေးခြင်း၊ ရပ်ရွာအတွင်း သောက်ရေသန့်ရရှိရေးအတွက် ရေသန့်စင်ခြင်း စနစ်များ၊ ရေတွင်းတူးဖော်ခြင်းနှင့် နိုင်ငံဝန်ထမ်းများ စွမ်းဆောင်ရည်မြင့်မားရန်အတွက် အင်္ဂလိပ်ဘာသာရပ်အား သင်ကြားပေးခြင်း လုပ်ငန်းများအား စီမံချက်ရန်ပုံငွေ အမေရိ ကန်ဒေါ်လာ (ဝ.၉၅)သန်းဖြင့် လိုအပ်သည့် တိုင်းဒေသကြီး/ ပြည်နယ်များတွင် လူမှုဝန်ထမ်းဦးစီးဌာနနှင့် ပူးပေါင်းဆောင်ရွက်သွားမည် ဖြစ်ပါသည်။ သဘောတူညီမှုစာလွှာ ရေးထိုး ဆောင်ရွက်ခြင်းဖြင့် မသန်စွမ်းသူများ၊ စီမံချက်ဧရိယာရှိ ပြည်သူလူထုများအတွက် သောက်သုံးရေရရှိရေးနှင့် နိုင်ငံဝန်ထမ်းများ စွမ်းဆောင်ရည်မြင့်မားလာမည့် အကျိုးကျေးဇူးများရရှိလာမည် ဖြစ်ပါသည်။