နေပြည်တော်၊ ဇွန်လ (၂၄) -

      လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ မေခလာခန်းမတွင် ဇွန်လ ၂၄ ရက်နေ့၊ နံနက်(၁၁း၀၀)နာရီအချိန်တွင် ပြည်ထောင်စုဝန်ကြီး ဒေါက်တာဝင်းမြတ်အေးအား မြန်မာနိုင်ငံ အထူးပညာရေးအသင်းမှ ဥက္ကဌဖြစ်သူ ဦးထာအုပ် ဦးဆောင်သည့်အဖွဲ့ဝင်များ လာရောက်တွေ့ဆုံခဲ့ပါသည်။

      ထိုသို့တွေ့ဆုံရာ၌ လူမှုဝန်ထမ်းဦးစီးဌာနနှင်‌့ ဧဒင်မသန်စွမ်းသက်ငယ်များ ပြုစုရာရိပ်မြုံတို့ပူးပေါင်း၍ အင်္ဂလန်နိုင်ငံမှ With Love All Things Are Possible Charity, UK နှင့် University of Welverhampton (UOW)တို့၏ ကူညီမှုဖြင့် “အထူးဂရုပြုစောင့်ရှောက်ရန် လိုအပ်သော ကလေးများ ပြုစုပျိုးထောင်ပေးမည့် ဆရာ/ဆရာမဖြစ်သင်တန်း” ကို ၂၀၁၃ ခုနှစ်မှ စတင်ဖွင့်လှစ်နိုင်ခဲ့ပါကြောင်း၊ ရေရှည်တွင် စနစ်တကျ ဆက်လက်ဖွင့်လှစ်နိုင်ရန်အတွက် “မြန်မာနိုင်ငံ အထူးပညာရေးအသင်း” (Myanmar Special Education Association MESA) ကိုဖွဲ့စည်းပြီး အသင်းအဖွဲ့ မှတ်ပုံတင်ထားပြီးဖြစ်ပါကြောင်း ရှင်းလင်းတင်ပြပြီး၊ ရှေးဦးအရွယ် ကလေးသူငယ် ပြုစုပျိုးထောင်ရေးနှင်‌့ ဖွံ့ဖြိုးရေးသင်တန်းများတွင် အထူးပညာရေး ဘာသာရပ်အား ဘာသာရပ်တစ်ခုအဖြစ် ထည့်သွင်းသင်ကြားနိုင်ရေး ကိစ္စရပ်များ၊ သင်ရိုးညွှန်းတမ်းများ အသစ်ရေးဆွဲရေးကိစ္စများ၊ ၂၀၁၆ခုနှစ်၊ အောက်တိုဘာလအတွင်း အထူးပညာရေးနှင့် ပတ်သက်သည့် ညီလာခံကျင်းပရေး ကိစ္စရပ်များ၊ အထူးပြုစုစောင့်ရှောက်ရန် လိုအပ်သည့် ကလေးသူငယ်များ၏ မိဘများအား “အထူးပြုစုစောင့်ရှောက်ရန် လိုအပ်သော ကလေးများ ပြုစုပျိုးထောင်ပေးခြင်း” သင်တန်းများ တက်ရောက်သင်ကြားရေး ကိစ္စရပ်များနှင့် ရေရှည်တွင် အစိုးရဝန်ကြီးဌာနများနှင့် ပူးပေါင်းဆောင်ရွက်ရန် ကိစ္စများကို ရင်းနှီးပွင့်လင်းစွာ ဆွေးနွေးခဲ့ပါသည်။