ကလေးသူငယ် ပြုစုပျိုထောင်ရေးနှင့် ဖွံ့ဖြိုးရေးဆိုင်ရာ မူဝါဒမိတ်ဆက် အခမ်းအနားကျင်းပ

နေပြည်တော်၊ ဇူလိုင် ၁၀ -

      မြန်မာနိုင်ငံ ကလေးသူငယ် အခွင့်အရေးဆိုင်ရာ အမျိုးသား ကော်မတီဥက္ကဌ၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာ ချထားရေးဝန်ကြီးဌာန၊ ပြည်ထောင်စု ဝန်ကြီး ဒေါက်တာ ဒေါ်မြတ်မြတ်အုန်းခင်သည် ဇူလိုင် ၈ရက် နံနက် ၉နာရီက သင်္ဂဟဟိုတယ်၌ ကျင်းပသည့် မြန်မာ့ရှေးဦးအရွယ် ကလေးသူငယ် ပြုစုပျိုးထောင်ရေးနှင့် ဖွံ့ဖြိုးရေးဆိုင်ရာ မူဝါဒမိတ်ဆက်ဖြန့်ချိခြင်း အခမ်းအနားသို့ တက်ရောက် အဖွင့်အမှာစကား ပြောကြားရာတွင် မြန်မာနိုင်ငံ၌ ကလေးသူငယ် အခွင့်အရေးဆိုင်ရာ အမျိုးသားကော်မတီ အစည်းအဝေးများကို နှစ်စဉ်ကျင်းပလျက်ရှိပြီး ဥပဒေ၊ မူဝါဒနှင့် လုပ်ငန်းစဉ်များကို ချမှတ် အကောင်အထည်ဖော် ဆောင်ရွက်လျက်ရှိပါကြောင်း၊

      ကလေးသူငယ်များ ဘက်စုံဖွံ့ဖြိုးရေးအတွက် မူဝါဒရေးဆွဲရာတွင် စီးပွားရေး၊ လူမှုရေးဆိုင်ရာ ကာကွယ် စောင့်ရှောက်ရေး၊ ပညာရေး၊ ကျန်းမာရေး၊ ပတ်ဝန်းကျင်ထိန်းသိမ်းရေးနှင့် ဆင်းရဲနွမ်းပါးမှုလျော့ပါးရေးစသည့် ကဏ္ဍပေါင်းစုံထည့်သွင်းရေးဆွဲထားပါကြောင်း၊ ရည်ရွယ်ချက်အနေဖြင့် မြန်မာနိုင်ငံတစ်ဝန်းလုံးရှိ မွေးကင်းစမှ ရှစ်နှစ်အရွယ်ကလေးများအားလုံး၏ စွမ်းအားအပြည့်အဝဖွံ့ဖြိုးနိုင်ရန်အတွက် ရှေးဦးအရွယ် ကလေးသူငယ် ပြုစုပျိုးထောင်ရေးနှင့် ဖွံ့ဖြိုးရေးဆိုင်ရာ ဝန်ဆောင်မှုများကို ရရှိစေရန် ဖြစ်ပါကြောင်း၊

       မူဝါဒကို ပါဝင်ရေးဆွဲခဲ့သည့် ဆက်စပ် ဝန်ကြီးဌာနများ၊ ပြည်တွင်းပြည်ပ အဖွဲ့အစည်း အားလုံးတာဝန် ယူမှု၊ တာဝန်ခံမှုဖြင့် ပေါင်းစပ်ညှိနှိုင်းပြီး ဆောင်ရွက်မှသာ ကလေးသူငယ်ပြုစုပျိုးထောင်ရေးနှင့် ဖွံ့ဖြိုးရေးဆိုင်ရာ လုပ်ငန်းများ ပိုမိုအောင်မြင်နိုင်မှာ ဖြစ်ပါကြောင်း၊ ယခုမူဝါဒကို မိတ်ဆက်ဖြန့်ချီနိုင်ခြင်းသည် နိုင်ငံတော်အစိုးရ အဖွဲ့ အနေဖြင့် ကျန်ရှိသောကာလအတွင်း ဒီမိုကရေစီနိုင်ငံသစ်ထူထောင်ရေးမှာ အခြေခံအုတ်မြစ်ခိုင်မာအောင် ဆောင်ရွက်ပေးရမည့် တာဝန်နှင့်ပြည်သူတို့၏ လူမှုစီးပွားဘဝ ဦးစားပေးလိုအပ်ချက်များအား ဖြည့်ဆည်းပေးရမည့် တာဝန်တို့ကို တတိဝအဆင့်အရှိန်အဟုန်မြှင့်တင်မှု(Third Wave) အဖြစ် ထိထိရောက်ရောက် ကြိုးပမ်းဆောင် ရွက်ခြင်း၏ပြယုဂ်တစ်ခုလည်းဖြစ်ပါသည်။

       ဆက်လက်၍ လူမှုဝန်ထမ်းဦးစီးဌာန၊ ညွှန်ကြားရေးမှူးချုပ်၊ ဦးစိုးကြည်က မြန်မာ့ရှေးဦးအရွယ် ကလေးသူငယ် ပြုစုပျိုးထောင်ရေးနှင့် ဖွံ့ဖြိုးရေးဆိုင်ရာ မူဝါဒအား ရေးဆွဲခဲ့သည့် လုပ်ငန်းစဉ်နှင့် မူဝါဒတွင် ပါရှိသည့် အဓိက အချက်အလက်များကို ရှင်းလင်းတင်ပြသည်။ ထို့နောက် ပြည်ထောင်စုဝန်ကြီးများဖြစ်ကြသော ဒေါက်တာ ဒေါ်မြတ်မြတ်အုန်းခင်နှင့် ဒေါက်တာဖေသက်ခင်၊ ညွှန်ကြားရေးမှူးချုပ် ဦးစိုးကြည်တို့က မြန်မာ၊ အင်္ဂလိပ်နှစ်ဘာသာဖြင့် ရိုက်နှိပ်ထုတ်ဝေထားသည့် မူဝါဒစာအုပ်ကို ဆက်စပ်လျက်ရှိသည့် ဝန်ကြီးဌာနများ၊ အစိုးရမဟုတ်သည့် ပြည်တွင်း/ ပြည်ပအဖွဲ့အစည်းများထံ ပေးအပ်ပြီး မူဝါဒဆိုင်ရာ အသိပညာပေး ဗီဒီယိုကို ပြသ သည်။

       မြန်မာ့ရှေးဦး အရွယ်ကလေး သူငယ်ပြုစုပျိုးထောင်ရေးနှင့် ဖွံ့ဖြိုးရေးဆိုင်ရာ မူဝါဒအား လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာနမှ ဦးဆောင်၍ ဆက်စပ်လက်ရှိသည့် ဝန်ကြီးဌာန(၉)ခု၊ ပြည်ထောင်စုရှေ့နေချုပ်ရုံး၊ ယူနီဆက်(ဖ်)၊ အစိုးရမဟုတ်သော ပြည်တွင်း/ ပြည်ပအဖွဲ့အစည်း (၁၃)ဖွဲ့တို့နှင့် ပူးပေါင်း ရေးဆွဲထားပြီး မဟာဗျူဟာလုပ်ငန်းစဉ်(၁၀)ချက် ပါဝင်ကြောင်း သိရသည်။

FacebookTwitter